Chinkasqa churimanta

Lk 15, 11-32

[Hisusqa] nirqataqmi: Huk runapam kapurqa iskay churin. Hinaptinmi sullkan taytanta nirqa: Taytáy, kaqkunamanta tupaqniyta quykapuway, nispa. Chaymi kawsananpaq kaqta iskayninman rakiykapurqa. Manaraq achka punchawmantañataqmi, lliwta huñuykukuspa sullkan churi ripukurqa karu llaqtaman, hinaspam chaypi mana allin kawsaypi kapuqninta yanqacharurqa. Lliwta tukuruptinmi, chay llaqtapi hatun muchuy rikurirqamurqa, chaymi paypaqpas pisipuyta qallarirqa. Hinaspam chay llaqtapi huk riqsisqa runaman hapipakuykurqa; kayñataqmi kuchikuna michiqpaq chakranman kacharqa. Chaypim kuchikunapa mikusqan algarrubuwan saksaykuruyta munaykuq; manataqmi pipas imallatapas quqchu. Yuyayninman kutiriruspanmi ichaqa nirqa: Taytaypa maychika llamkapuqninkunaraq tantawan puchupakuchkanku, ñuqañataq kaypi wañunayachkani yarqaymanta! nispa. Hatarispay, taytayman risaq, hinaspa nimusaq: Taytáy, hanaq pachapa kuntranpi, qampa kuntraykipiwanmi huchallirukuni; manañam churíy niwanaykipaq hinañachu kani; huk kaqnin llamkapuqniykita hinallaña kaykachiway, nispa.

Chaymi hatariruspan taytanman rirqa. Karullapi kachkaptinraqmi taytan rikururqa; hinaspam sunqunmanta kuyapayarikuykuspa kallpaykurqa; abrasakuykuspantaq, muchapayaykurqa. Hinaptinmi churi nirqa: Taytáy, hanaq pachapa kuntranpi, qampa kuntraykipiwanmi huchallirukuni; manañam churíy niwanaykipaq hinañachu kani, nispa. Kaywanpas taytanmi nirqa kriyadunkunata: Sumaqnin kaq pachata chaylla hurqumuychik, hinaspa chaywan churachiychik; anillutataq quychik makinpaq, sapatutapas chakinpaq; hinaspa wiran kaq turuta apamuspa, nakaychik; mikuspanchik kusikusun, kay churiy wañusqa kachkaspa kawsariramusqanrayku; chinkasqa kachkaspataq tarimusqa kasqanraykupiwan. Chaymi quchukuyta qallarirqaku.

Mayur churinñataqmi chakrapi kachkarqa; kaymi hamuruspa, wasiman hichpaykamuspanpiwan uyarirurqa musikata tususqankutawan. Hinaspam huk kaqnin sirwintita qayaykuspan, tapurqa imam chaypi kasqanmanta. Chaymi kay nirqa: Sullka wawqiykim kutiramun, chayraykum taytayki wiran kaq turuta nakarachin, sanulla chaskipusqanrayku. Hinaptinmi pay piñarukuspan mana yaykuyta munarqachu; chaymi taytan hawaman lluqsiramuspa ruygarqa. Payñataqmi kuntistarqa taytanta: Qaway, kaychika unay watañataq sirwiyki, mana haykappas kamachikuyniykikunata yanqachaspa, hinachkaptinpas manataq haykappas ñuqamanqa quykuwankichu huk kawrachallatapas amiguykunawan quchukuykunaypaq; aswan kay churiyki mana allin warmikunawan kawsanaykipaq kaqkuna tukumuq hamuruptinñataq, nakarachinki paypaq wiran kaq turutaraq, nispa.

Hinaptinmi pay nirqa: Churíy, qamqa ñuqawanpunim kachkanki, tukuy kapuqniykunapas qampataqmi; ichaqa kay wawqiyki wañusqa kachkaspa kawsariramusqanraykum, chinkasqa kachkaspa tarimusqa kasqanraykupiwanmi, quchukuspa kusikuna karqa.

(Lukaspa qillqasqanmanta, Ayakuchu rimaypi, 1954)

Runasimipi Willakuykuna, Qillqasqakuna

Runasimipi mañaykuna

Rapip qallananman


Last update: Jun 23, 2007. © runasimi.de.  The contents of this page may be distributed for non-commercial purposes, especially for spreading knowledge of the Runasimi language in the world and strengthening its position in its home lands. Please quote the original author (if not mentioned by name, write runasimi.de), and set a link to this page (write down URL, if texts or images of this page are used in printed version).