Hanaq pachap kusikuynin

Chunka qanchisniyuq ñiqin pachak wata unaqmanta, qillqaq mana riqsisqa
(17th century, author unknown / siglo XVII, autor desconocido).
Juan Pérez Bocanegra-pa (1600-manta 1680-kama kawsasqansi) 1631 watapi uyarispa qillqasqansi
(recopilado por Juan Pérez Bocanegra en 1631).

Kay qillqasqa hina, "š" siq'iwanpas qillqasqa p'anqa qhaway
(Ñawpa pacha Qusqupipas "š" ñisqas, kunan pachataq Qusqupi runakuna "s"-lla ñichkaptin, Chinchaysuyu k'itikunallapi "sh" qillqaspa "š" ñispa rimachkanku)

Takina qillqasqa (miludiya) - Melodie - Melody - Melodía

  1. Hanaq pachap kusikuynin
    Waranqakta much'asqayki
    Yupay ruru puquq mallki
    Runakunap suyakuynin
    Kallpannaqpa q'imikuynin
    Waqyasqayta.
  2. Uyariway much'asqayta
    Dyuspa rampan, Dyuspa maman
    Yuraq tuqtu hamanq'ayman
    Yupasqalla qullpasqayta
    Wawaykiman suyusqayta
    Rikuchillay.
  3. Chipchiykachaq qatachillay
    P'unchaw pusaq qiyantupa
    Qam waqyaqpaq, mana upa
    Qisaykikta "hamuy" ñillay
    Phiñasqayta qispichillay
    susurwana.
  4. Ñuqahina pim wanana
    Mit'anmanta sananmanta
    Tiqsi machup churinmanta
    Llapa yalliq millaymana
    Much'apuway yasuywana
    Wawaykikta.
  5. Wiqikta rikuy p'inkikta
    Sukhay sukhay waqachkaqman
    sunqu qhiwi phutichkaqman
    Kutirichiy ñawiykikta
    Rikuchiway uyaykikta
    Dyuspa maman.
  6. Hanaq pachap qalla sanan
    K'anchaq p'unchaw tutayachiq
    Killa paqsa rawrayachiq
    Anqelkunap q'uchukunan
    Hinantinpa rirpukunan
    Kawsaq pukyu.
  7. Qhapaqmanta miraq suyu
    Qhapaqkunap Qhapaqninpa
    Ñawpamanta wachaqninpa
    Gracia suq'uq, aklla phuyu
    Qampim suyan tiqsi muyu
    Dyus kusichiq.
  8. Quri wantu Dyus purichiq
    Huk simiwan huñispalla
    Dyus churikta chaypachalla
    Wiksaykipi runakachiq
    Ukhuykipi kamakachaq
    Runap marq'an.
  9. Wayna wallpap kusip marq'an
    Pukarampa qispi punkun
    Awasqaykim, yupay unkun
    Qamtam allwiqpaq akllarqan
    Kikiykipitaq munarqan
    Runa kayta.
  10. Usachipuway kawsayta
    Purum tasqi hupaykuyway
    Dyus sisaq inkill wiwa
    Maymantañach, Aquyayta
    Usachiyman, qam mamayta
    Qatachillay.
  11. K'anchaq rawraq, suma killa
    Chiqan p'unchawpa siqaynin
    Hinantinpa suyakuynin
    Qam millaqpaq ch'uqi illa
    Mana yawyaq pampa killa
    Dyuspa llaqtan.
  12. Qamman Quya pillam paqtan
    Tukuy santokunamanta
    Llapa Angelkunamanta
    Supaypa umanta waqtan
    Allpawan tupukta t'aqtan
    sutillayki.
  13. Ñukñu ruruq chunta mallki
    Runakunap munay kallcha
    Pukay-pukay sumaq phallcha
    sut'arpu tukuchiq khallki
    T'itu wach'iq nawillayki
    Qispi wampu.
  14. Qammi kanki Qhapaq tampu
    May-may kamapas uyaylla
    Qatiqiykipaq munaylla
    Hatun sunqupas hayrampu
    K'umuykuqkunapaq llamp'u
    Wakchay khuya.
  15. Wichq'aykusqa kusi muya
    Qhapaq yayap khaynakuna
    Yupay t'ika, akllakuna
    Jesus puriqchiq uruya
    Pillqu ch'antaq k'anchaq khuya
    suyakunqay.
  16. Sapallaykin q'imikunqay
    Kanki mama, kay pachapi
    Ña wañuptiy huq pachapi
    Kusikuyman thatkikunqay
    Q'uchukayman yaykuykunqay
    Qhapaq punku.
  17. Animayta uturunku
    Qallu llullmiywan llullaspa
    Pallqu kawsayman pupaspa
    Muyupuwan ch'unku-ch'unku.
    Chayñan maywaq intuykunku
    Wantunqanpaq.
  18. Hucha supay ayqinqanpaq.
    Yanapaway kallpaykiwan
    Hinaspari wawaykiwan
    Kay wakchaykip k'aynanqanpaq
    Mana tukuq kawsanqanpaq
    Atawchaway.
  19. Quri qullqa, qullqi ch'away
    Tita yachaq, waqaychaqa
    Qhapaq mikuy aymuranqa
    Muchunqayta amachaway
    Allin kaypi samachiway
    Qispinqaypaq.
  20. Gloria kachun Dyus yayapaq
    Dyus churipaq hinallataq
    Santo Espiritu paqwantaq
    Kachun gloriya, wiñayllapaq
    Kawsaykunap, kawsayninpaq
    Kusi kachun, Amen.
  21. Manaraq pacha tiqsisqa kaptin Sapay Quya,
    Dyusninchikmi, kikinpaq akllasurqanki.
  22. Hanaq pachap kusikuynin - takina qillqasqa
    (kuraq takinalla - tawantin takinamantam)

    Runasimipi Willakuykuna, Qillqasqakuna

    Rapip qallananman


    Partitura entera de "Hanaq pachap kusikuynin" - para orquesta (PDF) - http://www.swiss-music.net/ferrier/pdf/Hanacpachap.pdf

    Native Traditions in the Postconquest World (PDF) - http://www.doaks.org/Native/trad14.pdf

    Hanacpachac cussicuinin, Primer obra polifónica impresa (¿y compuesta?) en el Nuevo Mundo - http://www.oescalada.com.ar/Hanaq.htm

    Rapip qallananman


    Last update: Jan 8, 2004. © runasimi.de.  The contents of this page may be distributed for non-commercial purposes, especially for spreading knowledge of the Runasimi language in the world and strengthening its position in its home lands. Please quote the original author (if not mentioned by name, write runasimi.de), and set a link to this page (write down URL, if texts or images of this page are used in printed version).