La Señal de la Sancta Cruz

Sancta cruzpa vnanchanraycu,
aucaycucunamanta, quispichihuaycu Dios apuycu.
Yayap, Churip Spiritu Sanctop sutimpi.
Amén Iesus.

Cruzchacui

Santa Cruzpa unanchan raicu,
auccaicunamanta ccespichihuaicu Dios Apuicu.
Dios-Yayapa, Dios-Churipa Dios-Espíritu Santopa sutimpi.
Amén.

El Pater Noster

Yayaycu, hanacpachacunapi cac. Sutijqui muchasca cachun.
Capac caynijqui ñocaycuman hamuchun.
Munaynijqui rurasca cachun: ymanam hanacpachapi hinatac cay pachapipas.
Punchaunincuna tantaycucta cunan coaycu.
Huchaycuctari pampachapuaycu, ymanam ñocaycupas, ñocaycuman huchallicuccunacta pampachaycu hina.
Amatac cacharihuaycuchu, huatecayman vrmancaycupac.
Yallinrac, mana allimanta quispichihuaycu.
Amen Iesus.

Yayaicu

Yayaicu, Janacc-pachacunapi cacc, sutiqui muchascca cachun,
capacc cainiqui ñoccaicuman jamuchun,
munainiqui rurascca cachun, imainam Janacc-pachapi jinatacc cai-pachapipas.
Punchaunincuna tantaicuta cunan ccohuaicu,
juchaicutarí pampachapuhuaicu, imainam ñoccaicupas ñoccaicuman juchallicucc-cunata pampachanicu jina,
amatacc cacharihuaicuchu huateccaiman urmanaicuta,
llallinracc mana allincunamanta ccespichihuaicu.
Jinatacc cachun.

El Ave Maria

Muchaycuscayqui Maria,
Diospa gracianhuan juntascam canqui.
Apunchic Diosmi camhuan.
Huarmicunamanta collananmi canqui.
Vicçayquimanta pacarimuc Iesus huahuayquiri collanantacmi.
A Sancta Maria, Diospa Maman,
ñocaycu huchaçapacunapac mañapuaycu,
cunan, huañuynijcu pachapipas.
Amen Iesus.

Muchaicusccaiqui María

Muchaicusccaiqui, María,
Diospa gracianhuan juntasccam canqui,
Apunchic Diosmi ccanhuan,
huarmicunamanta ccollananmi canqui,
huicsaiquimanta paccarimucc Jesús huahuaiquirí ccollanantaccmi.
¡Ah! Santa María, Diospa Maman,
ñoccaicu juchasapacunapacc mañapuhuaicu,
cunan, huañuiniicu pachapipas.
Jinatacc cachun.

El Credo

Yñinim Dios yaya llapa atipacman,
Hanacpachap, caypachap ruraquenman,
Iesu christo paypa çapay churin apunchicmanpas.
Caymi Spiritu sanctomanta runa tucurcan,
Virgen sancta Mariamanta pacarimurcan,
Poncio Pilatop siminmantam muchurcan.
Cruzpi chacatasca carcan,
huañurcan, pampascatac carcan.
Vcupachacunaman vraycurcan.
Quimçañequen punchaupim huañuc cunamanta cauçarimpurcan,
Hanacpachacunaman vichayripurcan.
Dios yaya llapa atipacpa, pañañequempim tiyaycun,
chaymantam cana cauçac runa cunacta,
huañuc cunactahuampas taripac hampunca.
Spiritu sanctoman yñinim.
Sancta yglesia catholicacta.
Sanctocunap hucllachacuyninta.
Huchacunap pampachayninta.
Aychap cauçarimpuyninta.
viñay cauçaytahuampas yñinitacmi.
Amen. Iesus.

Apostolcunamanta Iñiinin

Iñínim llapa atipacc Dios Yayapi,
Janacc-pachapa, cai-pachapa ruraccnimpi.
Iñinitaccmi Jesucristo Paipa sapan Churin Apunchicpipas,
Paimi Espíritu Santomanta runa tucurcca,
Virgen Santa Mariamanta paccarimurcca,
Poncio Pilatopa siminmanta muchurcca,
cruzpi chacatascca carcca,
huañurcca, pampasccataccmi carcca,
ucu-pachacunaman uraicurcca,
quimsa ñeccen punchaupi, huañucc-cunamanta causarimpurcca,
Janacc-pachacunaman huicharimpurcca,
chaipim Dios-Yaya llapa atipaccpa allecc (paña)maquimpi tiyach-can.
Chaimantam, cai-pacha puchucaita,
causacc-cunata huañucc-cunatahuampas taripacc jamuncca.
Espíritu Santopi iñinim,
Santa Iglesia Catolicapi,
Santocunapa jucllachacuinimpi,
juchacunapa pampachainimpi,
aichapa causarimpuinimpi,
huiñai causaipihuampas iñinitaccmi.
Jinatacc cachun.

La Salve

Muchaycuscayqui çapaycoya,
huacchay cuya mama, cauçay, ñucñu,
suyanaycu, muchaycuscayquitac.
Camtam huacyamuycu Euap carcusca huahuancuna.
Camtam yuyamuycu, huacaspa, anchispa, cay vequepachapi.
Chay ari marcaycu,
ñocaycuman chay cuyapayac ñauijquicta cutirichimuy
Chaymantari, cay carcuypacha puchucaptin
collanan Iesusta vicçayquimanta pacarimucta, ricuchihuaycu.
A, llaquipayac, A, cuyapayac, A, ñucñu virgen Maria.
Sancta Diospa maman ñocaycupac muchapuaycu
Iesu Christop coscayquichicmi ñiscampa, caman cancaycupac.
Amen Iesus.

Muchaicusccaiqui Sapai Ccoya

Muchaicusccaiqui sapai Ccoya,
huac-chai cuyacc Mama, causai, ñucñu,
suyanaicu, muchaicusccaiquitacc.
Ccamtam ccayacuiquicu Evap ccarccosccan huahuancuna.
Ccamtam yuyamuiquicu, huaccaspa, anchispa, cai huecce-pachapi.
Chai, arí, marcaicu,
ñoccaicuman chai cuyapayacucc ñahuiquicunata cutirichimui
Chaimantarí, cai ccarccoi pacha puchucaptin,
ccollanan Jesús huicsaiquimanta paccarimuccta ricuchihuaicu.
¡Ah! llaquipayacc, ¡ah! cuyapayacc, ¡ah! ñucñu Virgen María.
Virgen Diospa Maman, ñoccaicu juchasapapacc mañapuhuaicu.
Jesucristopa ccosccaiquichicmi nihuasccancupa caman canaicupacc.
Jinatacc cachun.

Los Articulos de la Fe

Yñincanchic chunca tahuayocmi (Articulos de la Fè sutioc)
canchisninmi, Dios cayninmanta.
Huaquinin canchismi, Iesu Christo Dios apunchicpa runa cayninmanta.

Dios cayninmanta cacri, caymi.

1. Ñaupac simipim yñini, huc çapalla Dios llapa atipacman.
2. Yscay ñequen simipim yñini. Pay quiquin Diosmi Yaya.
3. Quimça ñequen simipim yñini. Pay quiquin Diosmi Churi.
4. Tahua ñequen simipim yñini. Pay quinquin Diosmi, Spiritu sancto.
5. Pichca ñequen simipim yñini. Pay quiquin Diosmi Camac.
6. Çocta ñequen simipim yñini. Pay quiquin Diosmi Quispichic.
7. Canchis ñequen simipim yñini. Pay quiquin Diosmi viñaipac cussichic.

IESU CHRISTO Dios apunchicpa runa cayninmanta cacri, caymi.

1. Ñaupac simipim yñini. Iesu Christo Dios apunchicmi Spiritu sancto manta runa tucurcan.
2. Yscay ñequen simipim yñini. Pay quiquin Iesu Christom virgen sancta Mariap vicçan manta, pacarimurcan: manarac huachaspa, huachaynimpi, ña huachaspapas viñay virgen captin.
3. Quimça ñequen simipim yñini. Pay quiquin IESV Christom ñocanchic huchaçapacunacta quispichihuancanchicpac, muchurcan huañurcan.
4. Tahua ñequen, simipim yñini. Pay quiquin Iesu Christom, vcupachacunaman vraycurcan, chay mantam Sanctocunap animan cunacta, paypa cussi hamuyninta suyachcacta pussarcumurcan.
5. Pichca ñequen simipim yñini. Pay quiquin Iesu Christom, huañuscanmanta quimça ñequen punchaupi, cauçarimpurcan.
6. Çocta ñequen simipim yñini. Pay quiquin Iesu Christom, hanacpachacunaman vichayripurcan, chaypim Dios Yaya
llapa atipacpa pañañequempi tiaycun.
7. Canchis ñequen simipim yñini. Pay quiquin Iesu Christom, cauçac runacunacta, huañuccunactahuampas, taripac hampunca.

Alli Christianocunactam hanacpachaman pussaspa viñaypac cussichinca,
camachicuscan siminta alli huacaychascanmanta:
mana allicunactam cana vcupachaman carcuspa,
viñaypac ñacarichinca, camachicuscan siminta mana alli huacaychascanmanta.

Los Mandamientos de la Ley de Dios

DIOSNINCHICPA camachicuscan simin chuncam:
ñaupac quimçanmi, quiquin Diosta yupaychancanchicpac:
huaquinin canchismi runamaçinchicpa allij nimpac.

1. Ñaupac simi ñinmi. Diosman sonco canqui tucuy yma haycacta yallispa.
2. Yscay ñequen simi ñinmi. Ama Diospa capac sutinta caçimanta juranquichu.
3. Quimça ñequen simi ñinmi. Domingocunapi, fiestacunapipas, çamacunqui Diosta muchancapac.
4. Tahua ñequen simi ñinmi. Yayayquicta, mamayquicta yupaychanqui.
5. Pichca ñequen simi ñimi. Ama pictapas huañuchinquichu.
6. Çocta ñequen simi ñinmi. Ama huachucchu canqui.
7. Canchis ñequen simi ñinmi. Ama çuacunquichu.
8. Puçac ñequen simi ñinmi. Ama pictapas, caçimanta tumpanquichu.
9. Yscon ñequen simi ñinmi. Ama runa maçijquip huarminta munapayanquichu.
10. Chunca ñequen simi ñinmi. Ama hucpa yma haycanta munapayanquichu.

Diospa cay chunca camachicuscan simi, yscaymanmi tucun.
Diosman sonco canqui tucuy yma haycacta yallispa:
runa macijquictari, quiquijquicta hina munanqui.

Taitachap Camachicusccan Simicuna

¿Diospa camachicusccan-simicuna jaicam? - Chuncam:
ñaupacc quimsam Taitacha yupaichanapacc,
huaquin ccanchisñataccmi: runamasincchicpa allinnimpacc.

1. Ñaupacc ñeccen simi ninmi: Diosman soncco canqui tucui ima jaicatapas llallirispa.
2. Iscai ñeccen simi ninmi: Amam Diospa ccapacc sutinta ccasimanta juranquichu.
3. Quimsa ñeccen simi ninmi: Domingocunapi, jatun fiestacunapi samacunqui, Diosta muchaicunaiquipacc.
4. Tahua ñeccen simi ninmi: Taita-mamai quitam yupaichanqui.
5. Pichcca ñeccen simi ninmi: Amam runa-masiquita huañuchinquichu
6. Soccta ñeccen simi ninmi: Aman huachucc-chu canqui.
7. Ccanchis ñeccen simi ninmi: Amam suhuacunquichu.
8. Pusacc ñeccen simi ninmi: Amam pitapas ccasimanta tumpanquichu, amataccmi llullacunquitacc-chu.
9. Isccon ñeccen simi ninmi: Amam runa-masiquipa ccari-huarminta muna-payanquichu.
10. Chunca ñeccen simi ninmi: Amam pipa ima jaicantapas munapayanquichu.

Chai chuncantin simicuna caillamanmi tucuncu:
Diostam cuyanqui tucuimanta llalliriccta,
runa-masiquitañatacc quiquiquita jina.

Los Mandamientos de la Sancta Madre Yglesia

SANCTA YGLESIA mamanchicpa camachicuscan simin pichcam.

1. Ñaupac simi ñinmi. Domingocunapi, fiestacunapipas missacta callariscanmanta, puchucancan cama vyarinqui.
2. Yscay ñequen simi ñinmi, huatancunapi hucmita confessacunqui, oncospa, huañuypac caspa, comulgancayquipacpas, confessacunquitac.
3. Quimça ñequen simi ñinmi. Iesu Christop cauçarimpuscan hatun Pascuapi comulganqui.
4. Tahua ñequen simi ñinmi. Santa yglesia mamanchicpa, ayunay ñiscampi ayunanqui.
5. Pichca ñequen simi ñinmi. Diezmosta, primiciastapas conqui.

Santa Iglesiap Camachicusccan Simicuna (Preceptos de la Iglesia)

¿Jaicam santa Iglesiap camachicusccan simicuna? - Pich-ccam.

1. Ñaupacc ñeccen simi ninmi: Domingoncunapi, jatun fiestacunapi: Misatam uyarinqui ccallarisccanmanta tucunancama, tucui llamcaimanta samaicuspa.
2. Iscai ñeccen simi ninmi: Huatapi juc cutillatapas confiesacunqui, sinchita onccospa, huañuipacc caspa, comulganaiquipaccpas.
3. Quimsa ñeccen simi ninmi: Huatapi juc cutillatapas comulgacunqui ashuancca Cuaresma-Semana Santa-Pascua ucupi.
4. Tahua ñeccen simi ninmi: Santa Iglesiap nisccan punchaucunapi ayunanqui, aichamantapas huaccaichacunqui.
5. Pich-cca ñeccen simi ninmi: Santa Iglesiapa necesidadnincunapacc yanapacunqui.

Los Sacramentos de la Sancta Madre Yglesia

SANCTA YGLESIA mamanchicpa Sacramentoncuna Canchismi.

1. Ñaupaquenmi: Baptismo.
2. Yscay ñequenmi: Confirmacion.
3. Quimça ñequenmi: Penitencia.
4. Tahua ñequenmi: Communion.
5. Pichca ñequenmi: Extrema vnction.
6. Socta ñequenmi: Orden.
7. Canchis ñequenmi: Matrimonio.

Sacramentocuna

¿Jaicam sacramentocuna? - Ccanchismi.

1. Ñaupaccmi: Bautismo.
2. Iscai caccmi: Confirmación.
3. Quimsa caccmi: Eucaristía.
4. Tahua caccmi: Penitencia (Confesión).
5. Pich-cca caccmi: Oncocc-cunap Sacramenton. (Santos Óleos).
6. Soccta-caccmi: Orden sacerdotal.
7. Ccanchis caccmi: Matrimonio (Casaracui)

Las Obras de Misericordia

Rvnap cuyapayay ruranancuna (obras de misericordia sutioc) chuncatahuayocmi.
Canchismi, vcunchicpac: Huaquinin canchismi, animanchicpac.

VCVNCHICPAC cacri, caymi.

1. Oncocta ricumunqui.
2. Yaricacta micuchinqui.
3. Chaquicta vpiachinqui.
4. Piñasta quispichinqui.
5. Llatan mana pachayocta pachallichinqui.
6. Llactayquiman puricta, huacijquipi corpachanqui.
7. Ayacunacta pampanqui.

ANIMANCHICPAC cacri, caymi.

1. Mana yachacta, yachachinqui.
2. Cunaypac cacta, cunanqui.
3. Muchuchijpac cacta, muchuchinqui.
4. Canman huchallicucta, pampachanqui.
5. Queçachaqueyquicta, queçachahuachumpas ñispa, muchucunqui.
6. Llaquicucta, puticucta, cochochinqui.
7. Cauçaccunapac, huañuc christianocunapachuan, Diosta muchapunqui.

Runa Cuyaihuan Ruranacuna

Cuerpopacc cacc-cuna caicunam:

1. Onccocc-cuna huatucui, paicunamanta nanachicui.
   
2. Yarccascca micuchii.
   
3. Yacunayascca upiachii.
   
4. Puricucc samachii.
   
5. Llatan pachachii.
   
6. Preso jurccomui.
   
7. Huañucc-cuna pampai.
   

Almapacc cacc-cuna caicunam:

1. Mana Yachacc yachachii.
   
2. Mana maiman cutiríí aticc allin cunai.
   
3. Pantacucc anyai, allin ñanman cutirichimui.
   
4. Piñachiccninchic-cuna pampachai.
   
5. Llaquiscca cusichii.
   
6. Runa-masinchic apai.
   
7. Causacc-cunapacc, huañucc-cunapaccpas, Taitacha mañapui.

Las Virtudes Theologales

Virtudes Theologales quimçam.

1. Yñincanchic. Fe sutioc.
2. Suyananchic. Esperança sutioc.
3. Munananchic. Charidad sutioc.

Virtudes-teologales

¿Jaicam cancu? - Ach-cam, ichacca llapanmanta caicunam:

1. Iñinanchic, "fe" sutiyocc, chaimi yanapa-huanchic,
2. Suyacunanchic, "esperanza" sutiyocc.
3. Cuyananchic, "caridad" sutiyocc.

Chai virtudcunapam sutin , Taitachaman rinapacc yanapaccninchiccuna casccancu raicu.

Las Virtudes Cardinales

Virtudes Cardinales tahuam.

1. Amauta cay. Prudencia sutioc.
2. Cuscachay. Iusticia sutioc.
3. Callpa cay. Fortaleza sutioc.
4. Pactaslla cay. Templança sutioc.

Virtudes-morales-cardenales

Cunan cai tahua ccepan jamucc virtudcunañataccmi sutichacuncu "Virtudes-morales-cardenaleshuan". [...]

1. Yuyaihuan-rurai, "prudencia" sutiyocc.
2. Cuscachai, "justicia" sutiyocc".
3. Callpayocc-cai, "fortaleza" sutiyocc.
4. Camayocclla-cai, "templanza" sutiyocc.

Los Peccados Capitales

Llapa huchacunap callarijnin, (pecados capitales sutioc) canchismi.

1. Ñaupaquenmi. Apuscachay hucha, Soberuia sutioc.
2. Yscay ñequenmi. Michacay hucha, Auaricia sutioc.
3. Quimça ñequenmi. Huachuc cay hucha, Luxuria sutioc.
4. Tahua ñequenmi. Piña cay hucha, Ira sutioc.
5. Pichca ñequenmi. Çacçapucuy hucha, Gula sutioc.
6. Socta ñequenmi. Chiquicuy hucha, Embidia sutioc.
7. Canchis ñequenmi. Quella cay hucha, Accidia sutioc.

Juchap Mamancuna

Llapa jucha imaña caspapas, cai ccanchisllamantam jamun; chai raicum juchap umancunahuan, utacc juchap mamancunahuan sutichanchic. Caicunam chaicuna:

1. Uma-juccarii-jucha: Soberbia sutiyocc.
2. Micha-cai-jucha: Avaricia sutiyocc.
3. Huachucc-cai-jucha: Lujuria sutiyocc.
4. Piña-cai-jucha: Ira sutiyocc.
5. Sacsapacui-jucha: Gula sutiyocc.
6. Chiquicui jucha utacc Jucpa allin cacusccanhuan ticcocui jucha: Envidia sutiyocc
7. Ccella-cai-jucha: Pereza sutiyocc.

Los Enemigos del Alma

ANIMANCHICPA aucancuna quimçam.

1. Cay llulla pacha. Mundo sutioc.
2. Çupay, Diablo sutioc.
3. Aychanchic, Carne sutioc.

Almanchicpa auccancuna

Almanchicpa auccancuna quimsam:

1. Cai-llulla-pacha: Mundo sutiyocc.
2. Supai: Demonio sutiyocc.
3. Millai-aichanchic: Carne sutiyocc.

Los Quatro Novissimos

Tahuactam pi maycan Christiano cac, viñaypac yuyaspa, soncompi apaycachanca.

1. Huañuyninta.
2. Diospa taripayninta.
3. Vcupachacta.
4. Hanacpachacta.

(Kay liwrupi llamkachisqa simikuna:)

1. Huañui.
2. Diospa taripainin.
3. Ucu-pacha.
4. Janacc-pacha.

La Confession General

Ñoca huchaçapam,
llapa atipac Diosman confessacuni.
Viñay Virgen sancta Mariaman, sant Iuan Baptistaman,
Apostolcuna, sant Pedroman, sant Pabloman,
llapa sanctocunaman, cam padremanpas,
ancham huchallicurcani,
yuyayhuan, rimayhuan, rurayhuampas,
Huchaymi, huchaymi, ancha hatun huchaymi.
Chayraycum, muchaycuni viñay virgen santa Mariacta,
sant Miguel Archangelta, sant Iuan Baptistacta,
Apostolcuna, sant Pedrocta, sant Pablocta,
llapa sanctocunacta, cam padrectahuampas,
apunchic Diosta, muchapuancayquichicpac.
 

Ñocca Juchasapam

Ñocca juchasapam
llapa atipacc Diospa ccaillampi confiesacuni,
jinallataccmi
ccamcunapa ccaillaiquichicpipas,
cuyasccaicuna,
anchatam juchallicurccani
yuyaihuan, rimaihuan, ruraihuan,
ima jaica ruranai mana juntachííhuampas:
juchaimi, juchaimi, ancha jatun juchaimi.
Chai raicum mañacuni huiñai Virgen Santa Mariata,
Angelcunata, Santocunata,
ccamcunatapas, cuyasccaicuna,
Apunchic-Diosta mañapuhuanaiquichicpacc.
Jinatacc cachun.